1401. Mai 3. Oppeln

Wir Ladislaus von gotes gnaden herczug vnd herre zu Opul etc. Tun kunt in desim briue vffinlicb vnd bekennen, das vor vns gestanden hat Petir Schoff von Semisdorff wol gesund an leybe vnd an vornumft, vnd hat bekant, das her vorkawft, vnd vormacht habe recht vnd redlich der ersamen Juncfrawen Agnessen von Rzebkowicz, Nonnen vnd Professen zu Czarnowans, eine halbe marg gulde vnd Jeriger Czinse, Prager mincze polnischir czal, yn vnd vff dem egenanten dorffe Semisdorff, gelegen in vnserm Glogoschim gebite, vnd vff allem gutte das her hat doselbist, vmb fumff marg grosschen derselben muncze vnd czal, vff eynen rechten wedirkawff, vnd denselben czins als eine halbe marg, der egenanten Juncfrawen Agnes, adir den die desin brieff mit erem willen ynne wurde haben, sal awsgegeben vnd beczalt werden von demselben gutte, alle Jar Jerlichen vff send Michils tag var allen andern czinsen, vnschedlich vnsern furstlichen Dinsten vnd rechten. Ouch mag Petir Schoff sulchen czins adir seyne nesten, wenne sie das vormogen, vmb fumff marg abe losen vnschedlich varsessen czinsen, vnd Juncfraw Agnes mag ouch dieselbe halbe marg wenne sie eres geldis nicht wil emperin, andern erbarn luthen vorseczen, in dem rechte als sie das hat vorfangen. Ouch hat vns Petir Schoff gebeten, das wir ym gunden, sich zu vorbinden var dem Official zu Breslaw sulchen czins bey dem banne auszugeben. Des haben wir angeseen seyn gebete, vnd gunnen ym sulchir varbindunge, in allir mase als oben geschreben steet. Mit Orkunde dis briues varsigil mit vnserm hangenden Ingesegel. Geben zu Opul an des heiligen Cruczes tage Inuencionis Nach gotes geburt fierczenhundert Jar, vnd in dem ersten Jare. Dobei gewest sein Petir von Bethaw hauptman zu Glogaw, Henrich Domancz, Jeschke van Leskowicz, Hannos Bursnicz van der Gemka, Hannos Struch, her Tyme vnser Caplan vnd Petir vnser Schreiber, Pfarrer zu Crappicz, dem deser briff wart befolen.

Mit anhangendem Siegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.